Exit Polls ji Election ozüng alema lir: EC

New Delhi, February 13 (Agencies): Tentet kati assembly election tagidak mapang exit polls agiba aser adoktsüba nung ajemdaker tanü Election Commission-i, assembly elections tagidak mapang nung exit polls agibaji election ozüngtem alema lir, ta metetdaktsü.
Election Commission otongdar kati, Resource Development International-i exit poll agiogo aser iba osangji Hindi osangkaket ka nung adokogo, aser ibaji Representation of the People Act Section 126 A aser B ozüng alema lir, iba den külemi Indian Penal Code Section 188 kübok Election Commission tetuyuba alema inyakba lir, ta metetdaktsü.
Iba dak sentakba nung pai, iba atema Uttar Pradesh nung Chief Electoral Officer dang nungi osang tejangja meshiogo, ta metetdaktsü.
Representation of the People Act tashi amshia EC-i exit polls nokdanger.
Tang tashi nung Goa aser Punjab na nung assembly election agiogo aser Uttar Pradesh nung election mezüngbuba shilem agiogo. Ajisüaka election metembang tashi Exit polls nokdanger.
Uttar Pradesh nung ano assembly election shilem trok agitsü anünga lir aser Uttarakhand o Manipur na nunga election agitsü lir.