External Affairs Ministry-i Mallya indang passport agienogo

New Delhi, April 15 (Agencies): Enforcement Directorate (ED)-i bank tem dang sentsüh jenti alisang, Vijay Mallya indang passport agientsü benokba sülen tanü External Affairs Ministry-i pa indang passport agienogo.
Sentsüh aliba ken o nung bushisüngdangba maparen nung Mallya-i bushisüngdangertem den meyariteper, kechiyong ED-i pa asemben jaokaka pai maru, anungji pa indang passport agientsüla ta ED-i benoka liasü.
IDBI dang sen crore 900  sentsüh maoba ken o nung Mumbai nung ED-i Honibarnü Vijay Mallya jaoka liasü.
Yaküm CBI-i FIR ka agütsüba nung ajemdaker ED-i Mallya anema ken o benoka lir.
Tamalen ED-i Mallya March 18, 2016 nü jaok, ajisüaka pai ano mapang meshisemba sülen maneni pa April 2 nü jaok, ajisüaka pai ED matsüngdangi maruteti liasü.
Mallya-i bank balala dang nungi sen crore 9,000 apuba magütsütetba nung ajemdaker taoba hopta Supreme Court-i pa dang, April 12 tashi nung India aser bendanglen pa aser par kibong rongsen-kiojen osang tejangja metetdakjang ta tuyua lir.