F-16 tayimtsü alitsü züngzüktepba meraksai lir:Pak

Islamabad, April 30 (Agencies) : Pakistan Ato Kilonser atema bendang linük den tongtepratepa inyaker Tariq Fatemi-i, raradang amshiba F-16 tayimtsü alitsü atema US den züngzüktepba meraksai lir, ta sangdong ka ajanga metetdaktsüba Pakistam osangkaket kanga ajanga sangdongogo.
US Congress-i Pakistan dang F-16 tayimtsü ayoktsü maparen anena atar ta sangdong ka ajanga metetdaktsüba sülen Tariq Fatemi-i iba o ya ashi.
Pai, “F-16 tayimtsü Pakistan dang ayoktsü atema US Congress den jembishinütsübaji Obama tebilemtsü lir,” ta ashi.
US ketdangsertem den Pakistan atema teyari ajak anena ataba lapokdaktsütsü asoshi tang jembidar anungji iba tebilemtsü tajungba kati nungpoka bener tugotettsü imlar, ta Fatemi-i ashi.
Rongsen aser raraba oset peria meliaka Pakistan nung tesüiba küm ana tashi telungpur aser kiralongrar den raraba mapang sen billion dollar 2 shi laluogo. Tang mita tudak aliba maparen ya Pakistan kija temulungtetba agi masü saka US, Afghanistan aser ano tanga linük kar dena, arok tangatettep nung aoerba lir, ta pai shisem.
Honibarnü osangbenertem den jembiba mapang Pakistan dang F-16 ayoktsü jembiba nung tetsükdaktsü kar lir ta Congress-i ashiba US ketdangsertemi osang tejangja metetdaktsü.
US State Department deputy spokesperson Mark Toner-i, “F-16 tayimtsütemji Pakistan nung kiralongrar aser telungpur den raratsü asoshi nüngdak aser iba ya ajanga teyari tulu agütsütsü ta onoki angateta lir aser iba dak sentakba nung parnoki masetshi-i rara arudagi,” ta ashi.
Toner-i, “Aji oda süaka F-16 tayimtsü Pakistan dang ayoktsü jembia ayuba nung tetsükdaktsü kar lir ta Congress züngsen kari shiogo. Obama-i aniba sorkaribo iba inyakyim nokdanga mali,” ta ashi.