F1-i asür Jules Bianchi nem tetushi agütsür

Paris, July 21 (Agencies): Formula One (F1) tetoktepba nung shilem agirtemi asür Jules Bianchi nem tetushi aser akümtsübo tanü Mongolbar nü agütsüogo.
F1 world champion, Lewis Hamilton densema asür Bianchi den külemi F1 tetoktepba nung shilem agirtemi France kübok Nice nung agiba asüpila sentep sentong nung shilem agia liasü.
Marussia telok indang gari anishir, arishi küm 25 tain Bianchi Japanese Grand Prix tetoktepba nung accident ajurur külen ita 9 tashi mozükidang taneptsü bushia amongba sülen taoba Hokolbar nütu asü.
Asür Bianchi-i taküm alidang asemba No 17 helmet pa tasümang süngden madak yur külen tanü Nice kübok tentetba Sainte-Reparate Cathedral telung nung agiba asüpila sentep sentong nung Hamiton aser külem Mercedes gari anishir, Nico Rosberg na den külemi, F1 ketdang asüba tentet, Fédération Internationale de l’Automobile (FIA) Tir, Jean Todt aser France Sports Minister, Thierry Braillard nungeri shilem agia Bianchi nem tetushi agütsü.
Taoba mapang, 1994 küm triple world champion Ayrton Senna San Marino nung tsükseta asüba sülenbo Bianchi F1 tetoktepba den sentakba accident nung asür mezüngbuba F1 gari anishir akümer lir.
Yaküm 2014 küm October ita 5 nü agiba Japanese Grand Prix tetoktepba nung accident ajurudang Bianchi tekolok kanga mejungi yiru aser iba anogo nungi tenzüka pa asüba anogo tashi Nice nung tentetba mozükidang pa taneptsü bushia ayuba osang jangjaogo.
1989 küm Nice nung asosang, asür Bainchi-i 2013 küm nungi tenzüka Marussia telok tenüng nung Grand Prix tetoktepba 34 tashi nung shilem agiba osanga bushitetogo.
Asür Bianchi nem tetushi agüja pai pa taküm alidang anishiba No 17 gari Grand Prix tetoktepba nung manishii oda ayutsü telemtetba ka FIA-ia agiogo.