FA Cup nung Tottenham-i 7-0 agi Tranmere akok

Aenjeti/January 5, 2019 (Agencies): Prenton Park nung Hokolbarnü Tottenham Hotspur nungi Spain nunger striker Fernando Llorente-i hat-trick ka agüja League Two (fourth tier) nung asayaba telok Tranmere Rovers 7-0 agi FA Cup tasembuba round mezüngbuba asaya kokogo.
Spurs puri tang mezüngbuba away nung takok tulutiba nguogo. Asaya mezüngbuba shilem tatemtsü minute 5 anunga lia defender Serge Aurier-i mezüngbuba goal agüja liasü.
Asaya mezüngbuba shilembo Tranmere puri kangajunga asayateta liasü saka asaya tanabuba shilem nung asaya khenyongi melenshiadok aser asaya tenzüker mapang tatsüka tsüngda Son Heung-min-i ball pass asüba Llorente-i idakja goal 2-0 aküm.
Iba sülen right back Aurier-isa Son-i pass asüba ball ka idakja pa asoshi goal tanabuba aser par telok asoshi tasembuba goal idakja liasü.
South Korea nunger forward Son-ia ball kanga junga belenshia lur goal ka idakja liasü.
Maneni Tottenham nungi asishi küm 18 tain midfielder Oliver Skipp-i minute 71buba nung Llorente nem ball tajungka yangluja goal pongububa idaktsü.
Iba sülen minute 1 lir Lucas Moura-i pass asüba ball ka kanga junga agizüka taoba Athletic Bilbao striker-i pa asoshi goal tasembuba idakja hat-trick agütsü aser minute majung tsüngda Mauricio Pochettino-i pa anitet aser Harry Kane yok koba Tranmere pur asoshi tebilemtsü ka liasü.
England captain Kane aniokba sülen mapang tatsüka dang lir pai par telok asoshi goal 7buba idakja parnoki asaya ayong ayonga kokogo.