FA-i Arsenal aser Tottenham dang senchi achi

Luchii/December 22, 2018 (Agencies): Luchii/December 2 nü Premier League asaya ka nung asayartem mazüoktetba atema Arsenal aser Tottenham Hotspur dang English Football Association-i Yangtepnü pound 95,000 senchi chiogo.
Iba asaya nung Spurs midfielder Eric Dier-i goal idaktsüba sülen ground tezülen oa benjungba ajanga Arsenal substitute tem mepelai mangatettep adok.
“Asaya nung asayartem mazüoktetba Arsenal aser Tottenham Hotspur-i nangzükogo aser club anadang ya senchi sen 45,000 aser 50,000 senchi chiogo,” ta FA-i sangdong ka ajanga metetdaktsü.
Gabon striker Pierre-Emerick Aubameyang-i goal ana aser Alexandre Lacazette aser Lucas Torreira nati goal kaka idakja Arsenal puri iba asaya akok. Asaya nung Spurs pur atema goal ana ya Dier aser Harry Kane nati idakja liasü.
Mepetmesü adokba sülen Emirates Stadium nung Tottenham pusemer kati Aubameyang dak mongu teküp ka agi aon. Tottenham puri aibelena alir nokdangtsü asoshi tenangzükba agütsüogo.
Iba sülen Metropolitan Police-i asaya mapang mepetmesü adokba nung densema alir prnok pezü aija liasü.
Maneni Rasemnü club ana League Cup quarter-final asayaba mapang Tottenham nungi asayar Dele Alli-i goal ana idaktsüba sülen pa dak plastic tzü bottle ka agi ona liasü.
Arsenal puri Yangtepnü ashiba agi, parnoki Dele dak bottle agi aonsang jangjaogo aser aija alisang ya aputsü asoshi police den sentepa inyakdar.