FAC anasa tribal boy’s hotel ka lapokogo

Honibarnü Mokokchung FAC anasa Tribal Boy’s Hostel lapoktsür külenTongti tesemdanger, Nagaland Higher Education Director, I. Alempokbai aser sentong nung shilem agirtem külemi tangokba noksa nung angur. Mokokchung, October 29, 2016.

Mokokchung, Oct 29 (TYO): Nagaland Higher Education Director, Wb. I. Alempokbai Honibarnü Fazl Ali College Mokokchung anasa Tribal Boys Hostel tasen ka lapoktsüogo. Iba hostel ya Ministry of DoNER New Delhi ajanga 2013-2014 kümsük nung NLCPR sentong kübok yanglu aser ibai Rural Women Development Trust (RWDT) Mokokchung teloki achayanga aser anepalua asüba ka lir.
Tanü iba sentong nung tongti tesemdanger Alempokbai jembidang, iba ya nükla tulu yur tarutsü lanu putu asoshi inyakba mapatong tajung ka lir, ta Rural Women Development Trust pur dang pelaba mezüngbuba metetdaktsü.
Tang RWDT-i asüba tribal boy’s hostel ya zünga Mokokchung nung tetsür teloki achayanga asüba hostel anabuba asütsü. Watsü Mungdangi tamalen Mokokchung D.E.O office anasa ka süa lir. Watsü Mungdangi asüba hostel ajanga kaketshirtem aika tajangzük ngua arudaki aser yamaji tang asüba hostel ajanga-a kasa tajangzük angutsü imlar, ta paisa shisem.
Aiben ali kiburtemi tekong merangdang mapa aika tetsükdaktsü ajuruba ajangshia aruogo, saka iba hostel asüba maparen nung ali kibur shirnoki tangatetba tajung nung tarutsü lanurtem asoshi ali tajung tenlaogo, “Tsüngremi nenok memoatsüiang malitsü”, ta paisa ali kiburtem dang pelaba olen ka ashi.
Tangatetba tajung lira tamakoktsü kecha mali, anungji, tarutsü nung mepet mesü kecha madoktsüsa iba hostel ya kanga junga anepaludaktsünür aser tongtibangsa asen den meküta aliba kabatemangna (atmosphere) junga ayutsü merangtsüla, ta paisa inyakdaktsünüba ka ashi.
RWDT ya lokti nung temelenshi bener aruba lokti ka südaktsünür aser tebur hostel dang masü saka tarutsü nungbo tetsür tribal hostel-a yanglutsü asoshi nükla yudaktsüner, ta paisa ayongzüka liasü.
Rural Women Development Trust (RWDT) ya Mokokchung nung alir tetsür telok kati nükla tulu yur tentetba registered society ka lir. Par telok nükjidongji tongtibangsa koda masür sensaker kaketshir tetsür/teburtem yaria rongsenkettsüng jenjang ajungkettsütsü maparen tapu balala inyaker. Par telok ya tajangzük magii inyakba mulungtet telok (non-profitable NGO) ka lir.
Iba hostel nung ya kaketshir noklang ka litettsü aser iba mapatong ya sen crore pezü dak tali indoka asüba lir. Iba hostel nung ya tongtibangsa koda masür kaketshirtem arua yangji lia kaketshisatsü balala bushitsü atema asüba lir.
Chuchuyimpang Baptist Arogo pastor Rev. Wati den sarasadema iba hostel tasenba meshitettsü. Tanü iba sentong nung taoba MLA Wb. R.Lepden Lkr, SDO PWD (H) Edu. Div. Wb. Senti, SDO Civil Mokokchung Wt. T. Lemlila, FAC Principal Wt. Chubayangla, Contractor & ali kibur nungi Wb. Talimar aser Mokokchung Putu Menden nungi yimsüsür kati shilem agia jembi. Tanü iba sentong nung RWDT tezülula Wt. Waila menden liasü.