FAC nung Functional English kaketshir nem tetushi agütsü

Tetushi tesemdanger Dr. Abemo den FAC Principal Dr. Arenla, Functional English tesayurtem aser 6th Semester (FE) internship takok angur kaketshirtem noksa nung angur. Mokokchung, 28th Mar, 2017.

Mokokchung, Mar 28 (TYO): Fazl Ali College Mokokchung nung Functional English Department-i ayongzüka B.A 6th Semester pur nem internship takok ngua renemba asoshi tetushi agütsüba sentong tajung ka Mungulbarnü yangi college conference hall nung akhümketa agiogo.
Tanü iba sentong nung tetushi tesemdanger Nagaland University nung Controller of Exam, Dr. Abemo-i mapang tatsüka agia jembidang, tesayurtemi kaketshirtem nüji kümdaktsütsü asoshi bülema inyakbaji atamata masü, kechiaser tesayur ajaki kaketshir shia pei sempet yari jenjang aketba nübu kaka kümdaktsünür, ta ashi.
Sentong nung taoba mapang FAC nung Functional English agirtem (alumni) rongnung EAC Monyakshu Sp. Sentilong Ozüküm aser Ao Milen osang zülur & Cartoonist Sp. Ayim natia taoba mapang ajangshiba den tayongzükba o balala bener arua tesentepertem ajungshi. FAC principal Dr. Arenla aser Functional English HoD Wt. Imsünaro natia mapang tatsütsü agia college inyakyim kar lemsatep.
Functional English ya Nagaland nung mezüngbuba 2001 küm FAC nung amenok. Iba subject ya nisung ka taküm nung pei sempet meteta tekolok shisatsü rendaktsüba ka lir. FAC nung Functional English agir kaketshirtemji teimba lenmang balala nung pei sempet yari mapa nguyonga aoba college otsü ajanga angazüker. FE ya tanga subject ka ama masü saka iba yabo teimba mapa dena aliba tesayuba ka lir. Tat agi; English ola adokren, orrlem, jembishinü tasa, media aser entrepreneurship nungertem densema lir.
Tanü 6th Semester nung parnok 6 nem internship takok ngua renemtetba temaitsü kuli kaket tajung kaka agütsüogo. Par 6 rongnung Internship-ji item nung agia liasü; kaketshir ana Radio Jockey, ka receptionist, ana tesayur aser ka tourist guide nung agi.
Sentong nung 6th semester nungi kaketshir Sp. Shingnyoh Khiam aser Kr. Kilenrenla nati FE agiba ajanga tajangzük anguba, ajangshiba aser parnok nübusen renlokba kar lemsatepa liasü. 2nd Semester kaketshirtemi jilushi tajung ka ia tesentepertem saksalemdaktsü.