Facebook ajanga France lendong nung pilaba tsürabur o kinü na ajurutepdaktsü

Paris, July 15 (Agencies) : Nice, France nung Bastille Day amungnü kiralongrartemi truck gari agi nisung menüngset yonga aoba lendong nungi ajentsü merangdang pilaba ita ti kinu tanur ka Social media tetsüti Facebook ajanga tettsü den tanaben lungjemdaktsüogo. Iba lendong nung nisung 84 asü aser 150 shi yiru.
Tiava Banner-i Facebook ajanga jabaso samaba osang agütsü, ta The Mirror osang ajanga metetdaktsü.
Lai lar jabaso indang noksa ka Facebook nung post asü aser iba teküpoklen lai, “Ozü BB ita ti samaogo. Anungji medemer tajungtem nenoki pa ngura imlibilema kü den tongtepratepang ma!!!!” ta zülua yutsü.
Iba post ya 21,000 ben tashi share sütep yonga ao.
Iba sülen tatsüka lir külen lai lar jabaso meyipa nguogo ta Facebook ajangasa metetdaktsü.
Iba sülen tebur, tetsür aser tanurtem noksa aika Facebook aser Twitter nung inokja parnok temeim lemsatepa liasü.
Nice lendong atalokba osang angashir külen Facebook-i FB nung aliba Safety Check feature lapok.
Social networking tetsüti-i tan agi asembenbuba iba Safety Check feature ya lapoker, ta CNET osang ajanga ashi.
Safety Check feature ajanga asenoki tembartem dang asenoka lendong tesem nung ali asü maliar metetdaktsütetter.
Iba feature ya taküm June ita Florida night club ka nung nisung 49 tepsetba lendong atalokba sülen nungi ang amshir.
Facebook-i iba feature ya lapoker hopta ana majung tsüngda taküm bendanga agütsür tapoktsü pokdaktsürtemi Istanbul, Ataturk airport nung nisung 45 pokseta südaktsü.