Facebook ajanga tarutsü nung lijalironga sütettsü

New York, October 30 (Agencies): Tarutsü nungbo Facebook ajanga tongtepratep asüba dang masü saka lijalironga sütettsü.

Social networking tetsüti yagi ‘Local Market’ ta ser ka tendangdar aser ibaji Facebook groups temi nungita inyakteper.

Facebook amshir aikati tawa tanü iba inyakyim tasen parnok Facebook iPhone app nung ngushiba shiogo. Iba ya khen khen “Messenger” button mela angutsü, ta Tech Crunch ajanga metetdaktsü.

Iba inyakyim ya tang tetendanger dang lir aser ano ayimsünga amshitsüsa metenzük. Iba ya shishilemba dak tesem tajung ka asütsü koba ajanga tayoka yoktettsü aser talia alitettsü. Anungji iba ya ajanga oset tapu ajak yoktettsü aser alitettsü.

Iba section tasenba nung ‘Buy’ aser ‘Sell’ tanemtsü ka ka lir, iba dak alia ano nai alinüba oset bushidang oset tenüng indang ojang ka (keyword) nemoktsür bushitsü lenmanga peria enokja lir.

Iba section nung tayoktsü aliba osettem indang noksa aser jenjang ajak peria zülur enokja alitsü.