Facebook CEO-i nübur bendangba atema taitok meshir

San Francisco, October 2 (Agencies) : Facebook CEO Mark Zuckerberg-i par social media sabang ajanga nübur yirudaktsüba aser parnok tsüngda bendangba atema taitok meshi aser pai tang nungi tajungba inyaktsü, ta metetdaktsü.
Küm nung Yihuda nunger temeshitiba anogo, Yom Kippur Deobarnü mungtemba sülen Zuckerberg-i, “Onoki tesüiba küm meyipa reprangdanger onok aibelen asoshi taitok meshir. Taküma shirnoksa temulung yirudaktsüogo nenokia tai tokangma, ni tang nungi tajungtiba inyaktsü merangtsü. Kü mapatem agi nisung anidena lungjemtsüdaktsütsü melena telemsaa ang tendaktsür. Ni nenok dak taitok meshir aser ni tarutsü nung tangdang nungi tajungba inyaktsü. Anünga aliba küm mapang tatsüka ya asenok ajaki tajungtiba inyaktsü merangdi aser nenok ajang iba taküm aliba kaket nung tenüng züluokang,” ta ashi.
2016 US Tir election mapang Facebook sabang nung Russia nunger indang ads aitba ajanga tang ya kanga tipmetemtetba mapang ka nung lir. Tir Donald Trump-ia iba sabang ya Trump anemer lir ta shia lir.
Trump-i iba o ashiba sülen Zuckerberg-i : “Trump-i Facebook agi pa nemer ta ashir. Liberals temi onoki Trump yarir ta ashir. Telok anapronglai katia ka tangatetba aitsüteper aser maginüteper. Oda sabang koba südir süaka khen reprangtsübo parnoki ashiba amaji asür,” ta telangzüba ka agütsüogo.
Sen dollar 100,000 alangba Russia political ads tem indang osang tejangja lemsatepba sülen Facebook kanga sashia miter.
Ozüng aser inyakyim kübok kanga junga asadangba sülen social media tetsüti yagi Hombarnü Russia ads 3,000 tashi Congressional investigators den lemsateptsü.
ReCode osang ajanga ashiba agi, Russia ads den külemi Facebook-i iba ads amshirtem tebilem kechi atema amshi aser parnok nem House, Senate Intelligence Committees aser Senate Judiciary Committee atemaji sen taa koma agütsü item osang tejangja lemsateptsü.
Facebook-i iba osang ya Special Counsel, Robert Mueller den lemsatepogo. Pai tang Russia-i election mapang shilem agiba mesüra magiba bushisüngdangdar aser iba den külemi account koba ajang parnok aru aser kechi inyakyimyim amshia aru iba indang ads aser osang balala indang copy bushisüngdangdar.