Facebook-i hopta shia tesempatep osang 66,000 shi indoker

July 1, 2017 (Agencies): Facebook-i osang ka nung ashiba agi, parnoki taoba ita ana hopta shia tesempatep osang ta asadangtetba tem 66,000 shi indoka liasü. Parnoki osang taila aser controversial topic tem bushiteta iba alama nokdangtsü asoshi meranga arudar aser parnoki tang agütsüba osang ya parnok temerangdangba nung shilem ka ama sangdong. “Onoki tesempatep osang balala FB nung inoktsüba anemer aser onok plateform nung iba amala osang proktsü asoshi memelar,” ta Europe, Middle East aser Africa atema Public Policy nung Vice President, Richard Allen-i post sütsü.
“Kin, ethnicity, national origin, tamangba ren, sexual orientation, sex, gender, gender identity, matamabensaba mesera tashidak dak sendakba nung kar anema züluba osangtemji onok-i tesemba osang ta züngshir,” ta Allen-isa ashi.
Ajisüaka osang karbo mejangjatetter kechiyong tezüluri kechi tebilemba aser nükjidong nung züluar mangateter aser khen khenbo osang kaji aisü nungi angateter. Iba amala tensa ka nung Facebook ketdangsertemi asadanger osang ka indoktsü asü mindoktsür telemtetba agir.
Facebook ajanga iba amala osangtem automatically filter asütsü soshi artificial intelligence (AI) amshitsü asoshi asadangdar, saka tang tashi nungbo FB amshirtemi osang agütsüba dak dang metaloker item osangtem asadangdar. “Onoki AI amshia osang tem asadangtsü asoshi inyakdar saka ano iba ya ataloktsü asoshi mapang talangka lir,” Allen-sa ashi.