Facebook-i kiralongraba ajungketba osangtem noktanger

United Nations, December 19 (Agencies) : Hopta shia Facebook-i kiralongraba mesüra tali bilemloka aoba tangatetba indang osangtem million aika noktanger, ta UN Counter-Terrorism Committee nung executive director, Jean-Paul Laborde-i ashi.
“Social networks nung kiralongraba teloktem den asenoki saku mesüra tekaraba asütsü merangtsüla” ta Laborde-i ashi.
“Asenoki nüjiso aser online privacy tsüngda toudangba ka yanglutsüla, saka kasa mapang nung alima nung aliba sensotem ajak kümzüka ayutsü nüngdak” ta paisa shisem.
“Islamic State amala kiralongraba teloktem tamakok ngudaktsütsü atema mezüngbuba teinyaktsüji internet aser social networks nung lir. Itemj alizüng tongtettsü atema civil society, UN züngsemtem aser Facebook, Google, Microsoft aser Twitter amala private enterprises tsüngda tesentaktep yanglutsüla” ta Laborde-isa metetdaktsü.
“Nija company temi parnok tamajung ta mesünür aser iba jagi teyari tulu agütsür. Tesüiba küm ana tsüngda YouTube-i kiralongraba dak sendakba osang indang video million 14 shi agienogo” ta paisa ashi.