Facebook-i kodanga na anema meinyak : Zuckerberg

San Francisco, September 28 (Agencies) : US Tir President Donald Trump-i, Facebook-ia, The New York Times aser The Washington Post osangkakettem den külemi ni anemer, ta ashiba CEO Mark Zuckerberg-i, Trump-i tai tongloktsübaji tamendakdak makab o lir, ta ashi.
Bodhbrnü Trump-i: “Facebook ji teti Trump anemer lir. Iba network yagi teti Trump anemer. Ano kü dang tejashi saka @nytimes aser @WaPo tem yagia Trump anemer,” ta ashi.
Ibaji langzüa Zuckerberg-i, “Trump-i Facebook-i pa anema inyaker ta ashir. Liberals temi onoki Trump yarir ta ashir. Telok anaya katia ka inyakyim maginüteper. Anungji ajak atema sabang yagia iba amaji inyaker amai angur,” ta ashi.
Zuckerberg-isa ashiba agi, 2016 US election nung kechi atalok ibaji nüburtem aikati jembiba ama masü aser kodang junga reprangdangdir Facebook-i tongti shilem agiba angutsü.
“Tamalen agia aruba election tem dang nungi tan agiba election nungang nübur timba kati pei bilemba lemsateptetogo. Offline ajanga meinyaktetba sensaksem million aika tanbo agitetogo. Osangbenertemi metetdaktsüba dang masü saka onük ajak rasaa jembiteptetogo,” ta pai post süja lir.
Yaküm Tir election mapang Facebook sabang nung sen dollar 100,000 alang Russian political ads aru ta olulu ka temai adokba sülen nungi iba sabang kanga junga mitdar.
“Ibai US election inyakyim nung mezüngbubasüa Facebook nung tapak kaka atakteta yutsür candidate temi nüburtem den chitepa jembidaktsüba election ka liasü,” ta pai shisem.
Inyakyim jung reprangdangba sülen aser ozüng metetertem den asadangtepba sülen, social media tetsüti yagi Congressional investigators den Russian ads 3,000 lemsateptsü shiogo.
Congress lenirtemi Facebook, Google aser Twitter dang Russia-i parnok sabang nung advertisements atema kecha alioka ali asü mali metetdakjang ta shidi yokogo.
Facebook-i Special Counsel, Robert Mueller nem item osang tejangja tawato agütsüogo, aser pai dang Russia-i US election mapang kecha timtem agütsütsü merang asü memerang ibaji bushisüngdang südar. Pai item ads indang shiditem aser iba ads aliba account indang osang tejangja aser kechi yimya nung iba ma mapa tamajung inyaktsü merang item ajakji bushidar.
Facebook, Twitter aser Google temi US Senate Intelligence Committee madak iba indang kuli agütsütsü.