Facebook-i Swedish Prosecutor nem Footage ka agütsü

April 1, 2017: Lokti kati tetsür ka tashiyim agi raksatsü, ta temolung melemi bilemba ken o ka nung Sweden nunger prosecutor tem teyari agitsü asoshi U.S. social media company Facebook nungi footage ka anguba metetdaktsüa liasü. Iba maparen teinyakdak nung Facebook ajanga iba video sayua liasü.
March ita tetenzük nung Prosecutor temi January nung tetsür ka tashiyim agi raksatsüba ken o dak sendakba nung nisung ana anema ken o benoka liasü. Iba nisung ana den külemi iba vedio prokshia tenüng menüktsüba nung aija ano nisung ka anema ken o benokogo.
“Onoki iba dak sendakba nung nüngdakba video nguogo,” ta Prosecutor Magnus Berggren-i osangbenertem dang ashi. Iba video Facebook ajanga prokshiba jangjaogo, ta paisa ashi.
Sweden nungeri iba dak sendakba nung Facebook nungi footage meshitsü asoshi U.S. justice department teyari meshia liasü.
Iba video ya Facebook amshirtemi reprangshiba sülen police nem metetdakja liasü.
Iba amala ken o ajanga Facebook Live aser yamala mesükba app tem nung tebenja aliba sayur.
Facebook Live ajanga tenokdangba kecaha melei nisung mashi kati smartphone ajanga video tem sayuteter.
Iba dak sendakba nung Facebook puri tang tashi nung kecha telangzüba agüja mali.
“Onoki iba ken o dak sendakba nung bushisüngdangtsü asoshi obendangertemi data meshia mepishiba nungita yaritsü,” ta March 15nü parnoki telangzüba agüja liasü.