Facebook-i tanurtem indang app adokba atema tebilemtsü abener

London, December 6 (Agencies): Facebook-i tanurtem indang app ka sayaba atema Christian charity kati tebilemtsü abenba osang metetdaktsüogo.
Facebook indang messenger app tasenba dangji “Messenger Kids” ta ajar aser iba ya ajanga tanurtemi kinungertem aser medemer den video chat aser message asütsü akok.
Ajisüaka, tanurtemi iba app amshitsü atema tsürabur dang nungi temelaba meshitsüla.
Facebook-i tanurtem atema bilemja mapa inyakba atema pelar saka onük kar atema bilemtsüla, ta Christian charity Care for the Family UK Director, Katharine Hill-i osangbener dang ashi.
“Tanur aser lanurtem mobil, computer aser laptop nung mapang endoktsü ajungmesoba atema tasüngdangba tulu ka lir” ta laisa ashi.
Facebook-i arishi küm 13 ser temapurtemi dang account lapoktsü melar saka talenba balaka maliba ajanga arishi küm 13 ser teküpok aliba tanur million 20 shi kati account lapoka Facebook amshir ta Consumer Reports ajanga metetdaktsü.
Messenger Kids ya United States nung smartphone mesüra tablet atema tang tendanga amshidar. Tanuri tsürabur indang Facebook account nungi dang iba app amshiteter aser Facebook profile balaka meyanglur.
Tsüraburtem aser safety experts den asüngdangya asüba sülen ang iba app ya yanglu ta Facebook-i ashir.
Katharine Hill-i tesüsabuba züluba ‘Left To Their Own Devices: Confident Parenting In A World of Screens’ kaket nung lai lanurtemi technology amshiba indang khurettem zülua lir.
“Tsüraburtemi tanurtem social media amshiba menokdangtsüla. Tsüngremi tsürabur ka ama asenok anishiba reprangdangra, telatetba aser tetuyuba kar lir saka pai asen nüjiso amshidaktsür. Khristan tsüraburtemia kasaji inyaktsüla aser asen chirnurtem dang tesayuba shitak agütsütsüla” ta Hill-i ashi.
“Asenoki mobile, computer aser laptop tem mamshitsü atema tenokdangba agütsüra, parnok yimdong nung kazütsü aser idakji tanur ka ket nung tenokdangba kecha melii phone ka bena alitsü aser ibaji parnok lemsatepa amshitsü” ta laisa metetdaktsü.
“Asenoki asen chirnurtem jungjunga anitettsüla aser parnok tain akümba ama tebilemtsü talila agütsütsüla. Asenoki parnok den mapang endoktsüla saka telatetbatemjia meraksatsü atema len anitsüla” ta Hill-isa shisem.