Facebook-i tesüiba mapang Google nung inyaker ka Internet project atema aniok

June 25, 2016 : Social media tettsüti Facebook-i, Google Fibre high-speed nungtetsang Internet project ka inyaktsü atema parnok den külemi inyaktsü aniokogo.
Tech osang Re/Code ajanga ashiba agi, Facebook-i Terragraph den lokteper nisung aika aliba yimtitem nung Wi-Fi benoktsü aser Microsoft den lungjemer fibre optic cable amshitsü mapa nung Kevin Lo, Director of Infrastructure Connectivity & Investments asütsü atema aniokogo.
Lo-i pa iba mapa atema shimba osang tejangja pa indang Facebook Page nung metetdaktsüogo. Pai, high-speed Internet mangur nisung billion pezü atema inyaktsü kanga jangrar, ta ashi.
“…ni tan ita nungi tenzüka Facebook nung Director of Infrastructure Connectivity & Investments ka ama inyaktsü indang osang kanga pelaseta lemsateper. Wire medeni agütsüba technology tsütsü terenlok lia alima rangben tesentaktep lidaktsütsü atema ni kanga meranga inyaktsü,” ta Facebook nung zülu.
Ajisüaka Lo-i sen dalang agi tang renlokya-a aliba linüktem nem agütsüba internet tsütsübo kecha teka maitsü.
Google Fibre ama Internet agütsütsü atemabo tebilemba mesüra sentong kecha mali, ta Facebook-i metetdaktsüogo.
Lo ya Google nung 2010 küm nungi tenzüka inyak aser pa den nisung ka dena Google indang Fibre project nguteta pai Goolge product, business aser inyakyim ajak acha ayanga liasü. Pai 2015 küm Google toktsü.
April ita nung Facebook-i Google nung inyaka alirsa ka, Regina Dugan parnok den anioka Advanced Technology & Projects (ATAP) division nung inyakdaktsüdar.