Facebook indang button tasenba ajanga osang taila putettsü

San Francisco, October 06 (Agencies): Facebook indang Mews Feed nung aliba otsütem shitak asü taila-ar ibaji jangja meteta azüngtsü, lemsateptsü aser amangtsü asoshi Facebook-i tamshirtem asoshi tanemtsü tasen ka (new button) tendangdar. Iba tanemtsü tasenba nung ya osang taila angutsü aser osang kaji kechilen nungi aru ibaji metettsü asoshi tanemtsü lir.
Osang tailaji Facebook aser tanga sabangtem nung osang tasentem atsüzüka jangjar teindoktsü mesüra osang taila jangjaba maparen inyaktettsü asoshi lir.
Tanga sabangtemji osang adoker Wikipedia entry lir, parnok indang tapak sülen anidaktsü asoshi tanemtsü ka lir, kanga sapua reprangtepba articles mesüra kasa onük nung ajemdakba ocet aser osang aser iba ocet koma sür kolen nungi Facebook-i aru itemji metettsü asoshi iba inyakyim tenzüker, ta social media sabang ajanga parnok blog post nung Hokolbarnü metetdaktsü.
“Osang kar atemabo item temetettsü peria malir, onoki nüburtem dang metetdaktsütsü, aser ibaji ajanga tang jembiba onük nung teyari agütsütettsü,” ta Facebook blog post nungjisa shia lir.
Iba amala mera tasen ya tawa atalokba Las Vegas injang lendong mesükba atema kanga nüngdak, kong Google, Facebook aser Twitter ajaki osang taila menokdangteti parnok sabangtem nung adokdaktsü.
Facebook indang “Security Check” tapak – koba ajanga nüburtem alima nung lendong tsüdong atalokdang tembartem aser pei meimertem asoshi osang post asür – iba nung blog post tasen ka “Alt-Right News” ta ser adokja lir, aser iba nungji: “iba injang lendong nung nisung tepsetsangji Trump sebar, America television nung sentong ketdangser, Rachel Maddow liasü südi” ta aibelena post asü.
Facebook-i, ozü security staff-i iba post delete asü. Aji oda süaka minute ishika menurang delete asüba ajanga screen captured aser online ajanga prokshiadok. Onoki iba ama aibelen masütsü asoshi inyaktepdar aser iba osang ajanga nüburtem makmakshimakdaktsüba atema kanga sasa bilemer,” ta Facebook-i ashiba Fast Copay ajanga metetdaktsü.
“Tanemtsü tasenba ya lokti nungi aginüba ama inyakdangba ka lir, aser iba den külemi publishers aika dena Facebook Journalism Project kübok ibai yanglu,” ta Facebook-i blog post tasenba nungji shia lir.
Nüburtem iba ama tongtibang osang lapoktsü yariba ajanga parnoki publisher temi osang inoktsübatem amangtsü mesüra mamangtsü nung telemtetba agitettsü, ta kasa post nung shia lir.