Facebook mamshiba ajanga meimchir tepelaba kümdaktsür: HRI

London, November 11 (Agencies): Alima ajunga nung kanga dang saputepa aser tongtibang süa amshiba social media, Facebook amshiba toktsüba ajanga meimchirtem tepelaba kümdaktsüba osang ka Denmark nung tentetba Happiness Research Institute (HRI)-i bushitetogo.
HRI teloki anogoshia Facebook amshir nisung 1095 anidener parnok telok 2 küma lemsa aser telok ka nem taoba mapang ama Facebook amshidaktsü saka tanabuba telok nem Facebook mashidaktsüi parnok tendanga liasü.
Telok anaji hopta ka tashi tendangba sülen Facebook mamshidaktsür telok nung densemer nisung noklang nung shilem 88-i parnok taoba mapang nungi tepelaba akümba osang metetdakja liasü.
Ajisüaka, anogoshia Facebook amshir telok nung densemer nisung noklang shilem nung shilem 81-i dang parnok taoba mapang nungi tepelaba akümba osang bushitet.
Ano, hopta ka tashi Facebook mamshirtemi parnok taoba mapang nungi rongjena aliba ajema akümba, kechisarena inyaktsü tejangraba aliba, shisaboluba ajemba aser telemtetba balala atsüayong mesüi agiba osanga HRI teloki bushitet.
Facebook mamshirtemi medemer aser kinüngertem den mapang timba indokba aser parnoki inyaksangshiba nung tali temulung agüja tajangzük anguba osanga bushiteta liasü.
“Anogoshia Facebook amshiba ajanga tangar taküm aliba ama linüa, nisung aikati pei taküm jenjang dak temulung masüba osang tan bushitetogo,” ta HRI nung CEO, Meik Wiking-i metetdaktsü.