Guwahati, February 14 (Agencies) : Assam Police nung Deputy Superintendent of Police (DSP) kati social networking site Facebook nung Muslim nunger anema osang züluba atema mapa nungi anentsüogo.
DSP ji Anjan Bora lir aser pa ya Karbi Anglong district nung mapa lemzükja liasü. Honibarnü pa mapa nungi anentsü aser pa anema departmental enquiry ka asütsü aser temelaba melii pa state adena maotsü atema tetuyuba agütsüogo.
DSP Anjan Bora-ibo nisung kari pa indang Facebook account tim mesüi lapok ta ashir saka pai ashiba nung taitsü aika keta lir.
Anjan-i züluba osangtem nung pai Muslim nunger sempaba aser ‘Azan’ (Muslim prayer call) anendaktsütsü tenangzükba agiba shia lir.
Paisa, Assam kübok Bodoland Territorial Autonomous Districts (BTAD) nungi Congress MLA Rafikul Islam dena nütsüng agi tangar memenepba kin nungi nisung aika tepsetogo ta shia lir.
Pa indang post ka nung “Jai Sri Ram, Jai Hindustan, Jai jai sri Ram jai hindubhumi. Asenoki Muslim nunger maliba Hindustan nung adentsüla” ta zülua lir.
Anjan-i Facebook nung züluba osangtemji local okatsür Aman Wahud-i lemsatep aser itemji kanga kara belenshi. Aman-isa sorkar ketdangsertem dang iba osang metetdaktsü aser parnoki tekaratiba nung teinyaktsü mapa inyak.
Iba dak sendakba bushisüngdang maparen metembang tashi, Anjan mapa nungi anenja atar, ta ketdangsertemi tetuyuba agütsü.
You must be logged in to post a comment Login