Facebook nung ‘Safety Check’ enokja lir

New Delhi, January 04 (Agencies): India anüdoklentip tsütsü Hombar anepdang Richter Scale 6.7 menoknok tesashi ka anokba sülen kinunger aser tembartem dang kümzüka lir ta metetdaktsütsü asoshi Facebook-i ‘safety check’ tool ka enokja lir.
“India anüdoklentip tsütsü menoknok tesashi ka anok aser iba tesem nung aliba nüburtem kümzüka aliba metettsü atema onoki Facebook nung Safety Check enokja lir,” ta Facebook ngutetsang Mark Zuckerberg-i Facebook nung zülua lir.
“Iba menoknok ajanga Bangladesh, Myanmar aser Nepal tesemtema anokshidaktsü. Safety Check ajanga nür tembar aser kinungertem kümzüka aliba nai metettsü aser parnokia yamaji na kümzüka aliba metettsü,” ta Zuckerberg-i züluba nung lir.
Iba menoknok adokba tesem tiyongji Manipur nung aliba Tamenglong district lir aser iba lendong anepdang 4:35 ako meta ataloka liasü.
“Iba menoknok nung tasür aser yirur alir kibong ajak den shisabulu khuret lemsateper,” ta Zuckerberg-i ashi.
Iba safety check tool ya https://www.facebook.com/safetycheck/manipurearthquake -jan03-2016 nung angutsü.
Zuckerberg-i Facebook nung züluba orenji FB amshir 100,000 dak temai ‘like’ süa lir.
“Mark Zukerberg dang kanga pelar. Ni tang Bangaladesh nung sodi amunger aser ni aliba tesemji Manipur, India anasa lir,” ta Facebook amshir Aminul Haque Chowdhury-i facebook ajanga lemsatepogo.
Chennai nung tesüiba küm tzümetsüng lendong atalokba mapanga Facebook-i “Safety Check” tool enokja liasü.
Iba safety tool ya October 2014 nungi amshir aser iba ya ajanga lendong atalokba mapang kümzüka ali mali metettepteter.
Iba Safety Check nung “I’m Safe” tanemtsü ka lir aser iba nungji anemba ajanga kinunger aser tembartemi na kümzüka aliba meteter.
Aji dang masü saka Facebook amshirtemi tembartem kümzüka ali mali-a reprangtettsü.