Facebook nung tashishitsü noksa lemsaba atema nisung ka apu

Kohima, August 31 (TYO): Facebook nung tetsür ka indang tashishitsü noksa tamajung ‘post’ asüba atema Cyber Crime Police Station, PHQ, Kohima-i nisung ka puogo, ta tanü police sangdong ka nung metetdaktsü.
PRO PHQ, M.Tungoe-i ashiba agi, tang pua alisang aser tetsürla naji Facebook ajanga metettep aser tena meimtepa liasü; ajisüaka tesülen tetsürla jagi tangar tebur dena tesendaktep ayur südi ta melung malem tenzükba agi tebursang jagi tetsürla indang noksa tamajung facebook nung ‘post’ asü.
PRO, Nagaland Police-isa, IT Act, 2008 kübok social media nung tashishitsü noksa/mangsa noksa lemsatepbaji ozüng alema lir, aser küm 3 tashi tepoukdak ayutsüa akok, mesüra senchi sen lakh 5 tashi achitsüa akok, ta metetdaktsüogo.
State nung Facebook, Whatsapp, Instagram, Twitter ama social media balala nung tenük yokdar, aser item ama mangsa/maakmanü noksa tamajungtem kecha marendaki post asür/lemsateper aser copy paste asür ta reprangtetogo, ta kasa osang ajanga ashi.
Anungji nüburtem dang item ama tashishitsü maakmanü noksa melemsateptsü, aser yamaji inyakra temerenshi alitsü metetdaktsür, ta police-isa ashi.