FAC:Sentiakum aser Lipokrenla nati Mr.& Mrs. Fresher’s 2016 korang nguogo

July 14, 2016 nü Fresher's Day sentong temer külen Sentiakum aser Lipokrenla na noksa tangoktsü nokdaka ataba noksa ka yangi angur.
July 14, 2016 nü Fresher’s Day sentong temer külen Sentiakum aser Lipokrenla na noksa tangoktsü nokdaka ataba noksa ka yangi angur.

Mokokchung, July 14 (TYO) : July 14, 2016 nü Mokokchung jila nung aliba college tem rongnung tejentiba, Fazl Ali College (FAC) Auditorium nung Fresher’s Day sentong kanga takok ngua agiogo. Kaketshir nisung 18-i iba tetoktep nung kanga junga shilem agi aser tesüsa Sentiakum aser Lipokrenla nati Mr.& Mrs. Fresher’s 2016 korang angu.
Iba sentong nung Mokokchung Town Lanur Telongjem (MTLT) Tir Wb. Imkummeren tetushi tejaker liasü aser pai, “Pei sasep nung dang naipanger melii tasü ita mera tasen agitsüla aser takok ngunera tangatetba melenshitsü nüngdak,” ta pa o jembiba mapang kaketshirtem ayongzük.
“Asenok ya tang lanur ka ka lir, anungji aseni tarutsü atema bilemdangba nükjidongtem atema koba tashi ka asenoki inyaktetdar ibaji kanga junga shisadangtsü nüngdaker,” ta Imkummeren-i shisem.
Fazl Ali College Student Union, General Secretary (GS) Temjennaro Jamir-i taküm nungi college-i aitertem (Freshers) ajak pela agizük aser tang nungi tenzüka kibong ka amai tepong langer aotsü ayongzük.
College Principal Chubayangla-i, “Tesayurtem dang masü saka college nung inyaker ajak akümtsübutsüla aser tashi angaba dang masü saka metetnüa/angatetnüa bilemba ajak marendaki asüngdangya asütsü nüngdak,” ta lai o tatsüka jembiba mapang ashi.
Iba sentong Wb. Bendangnungsang aser Wt. Rongsenchila nati ketdang asü, Cool Creek Boys hostel nung alirtemi pela agizükba ken ka aten aser Nungshikala-i temeja ken ka aten. Ano tasenpur tenüng nungi Wb. tsungpong Longchar-i o tatsü ka jembi.

You must be logged in to post a comment Login