Faith Theological College (FTC) 8 buba graduation sentong agi

Dimapur, April 18 (TYO): Naga loktiliba nung school züngtor anener aika lir aser iba khuret ya tuluka lir, ta Mongulbarnü School Education & SCERT Minister, Yitachu-i ashi.
“Asen lanur shilem asemsü nungi anasübo school züngtor anenertem lir. Secondary jenjang ajangteter kaketshir shilem ka dang süra, kodaser asen loktiliba renloktsü?” ta Yitachu-i asüngdang.
Mongulbarnü Dimapur Town Hall nung Faith Theological College (FTC) 8 buba graduation sentong nung jembidang Yitachu-i ashiba agi, asen state nung education system mejungi kümogo aser iba ya metongshitsü atema mapa inyaktsüla.
Nagaland nung Class 2 kaketshir 49,480 tenüng züluoka liasü aser Class 9 nung kaketshir 36,000 liasü. Iba ajanga Class 2 aser Class 9 tsüngda kaketshir 13,480 tashi züngtor anenba sayur, ta paisa metetdaktsü.
Maneni Class 10 nung kaketshir 22,214 tenüng züluoka liasü aser ibaji ajanga Class 9 aser 10 tsüngda kaketshir 14,000 züngtor anen, ta School Education Minister-isa shisem.
Nagaland nung kaket shisatsü bushibaren nung inyakyim balala inyakogo. Ajisüaka, tetsükdaktsü tulu rongnung kaji Math aser Science tesayur mapa tanga subject teacher mapa melenba lir. Iba ya ajanga school aika nung Math aser Science tesayurtem mali. Iba ya ajanga asen tarutsü raksatsür. Iba jagi sorkari Math aser Science tesayurtem lemzüktsüba mapa ama memelen tashi graduate teachers sota ayutsü telemtetba agiogo, ta Yitachu-isa metetdaktsü.
“Nagaland state nung kaket shisatsü bushiba, yimtenren mesüra tamangba yimsü tsütsü süaka ajak nung tebenja lir, kechiyong Naga nungeri mezüngbuba nung Tsüngrem metsübur. Asenoki asen medemer, kibong, yimer, kin aser tangartem tsübur saka Tsüngrembo metsübur. Khristan ka ama asenoki mezüng Tsüngrem tsübutsüla aser ibaji inyak nungdang asen loktiliba tejakleni aotsü aser melenshitsü” ta paisa shisem.
Sentong nung Bible Society of India, Dimapur auxiliary secretary, Rev. Dr. ZK Rochill-i laishirtem ayongzüka o jembi, FTC founder principal, Rev. Dr. S Gangte-i ‘charge to the graduates’ agi.
Faith Theological College (FTC) 8 buba graduation sentong nung laishir 29 graduate asü.