Faith Theological Seminary nung 33 renem

June 2, 2016 nü Faith Theological Seminary convocation sentong nung graduate asürtem aser tesayurtem külemi agiba noksa angur.

 Kohima, Jun 2 (TYO) : Kohima nung Faith Theological Seminary (FTS) pur 8 buba Convocation sentong Brehostibarnü parnok college Chapel Hall nung liogo. Taküm FTS nung renemertemji laishir ajak agi 3 liasü. Parnokji B. Th, M. Div, M. Min aser M. Div Extension degree angurtem liasü.

Iba sentong nung graduate asürtem ayongzüka jembidang, FTS Principal, Rev Dr Visielie Angami-i parnoki abenba osangtajung milakji tesem ajaklen prokshia aotsü asoshi ayongzük.

Tanü putu nung Tsüngrem mapa inyaka jajatsüba tasak, anungji tamang tulu alitsübaji kanga nüngdaka kümogo ta paisa ashi.

‘Tsüngrem dak tamang kateta alitsübaji Pa tsüngdang shitak aser ochishia alitsübaji lir, anungji laishirtemi Tsüngrem aser nisung tsüngdang Yisu asoshi taküm dena bendanga agüja inyaktsü asoshi temulung lemtettsüsa alitsübaji kanga tenüngdaktsü,” ta   Rev Visielie-isa ashi.

Graduate asürtem rongnung nisung 13 Master of Divinity angu, nisung 14 Bachelor of Theology, ka Master of Ministry aser nisung 5 Master of Divinity (Extension) angu.