Fambanglho wildlife sanctuary nung morok mi adok

Gangtok, February 06 (Agencies): Gangtok nungi kilometer 10 shi pilar Fambanglho Wildlife Sanctuary, Tinjurey tenem kong nung Hombarnü morok mi tesashi adok, ta ketdangsertemi osang ka ajanga metetdaktsü.
Morok mi adokba tesemji kanga dang longren lir, anungji mi remseptsü asoshi helicopter nungi tzü yoktsü atema Indian Air Force (IAF) dang Sikkim sorkari tanü teyari meshi.
Mi remseptsü asoshi IAF helicopter temi tzü 18 benbo bener tua inloktsüogo. Iba mi ya Nampong yimtsüng tekolaklen adok, ta parnoki shisem.
Iba mi February 4 nü jangru tenzük. Mi remseptsü asoshi forest, police, civil aser fire service ketdangsertem den local panchayat, joint forest management committee züngsem aser yimdaklirtem yashiang iba tesem atong, kechiyong iba tesem longren agi sünga lir, aser nisung senzütsü asoshi kanga mesatem. Parnoki maparen tenzükogo, aser maneni asünga inyaktsü, ta osang ka ajanga metetdaktsü.
State nung tsüngsarosa uluraba ajanga arem nung mi adok. Forest department-i arem anasa aliba yimtsüngtem aser nebur ajak dang aremi picnic, camping aser tanga mapa atema aodang, mi jangrolokdaktsüba osettem mamshitsü asoshi metetdaktsü.