Farah Khan-i choreography course ka lapoktsü

Mumbai, September 01 (Agencies) : Choreographer asüba film director akümla, Farah Khan-i tesüiba mapang nüngtugu ken kar choreograph süa lir aser ano lai tang choreography course ka lapoktsü sentong yangludar.
Farah Khan-i Shashi Ranjan indang ITA (Indian Television Academy) den lungjemer India nung tan mezüngsüa choreography course ka design asütsü.
“Nüburtem kü dang kechiba dance class melapoker ta küm aika asüngdanga arur saka ni iba mapaji mejangrai liasü. Ni tangar den kasa dance class lapoktsü atema tejangraba kecha maliasü. Nisung aikati dance class lapoka mapa tulu inyaktetogo ajisüaka nibo mejangra,” ta Farah Khan-i Mumbai nung sentong ka akadang ashi.
“Kü dang iba ya atema (choreography course) asüdangdang parnoki tangar dang nungi dance class balaka lapokner ta ashidang ni kanga pela liasü. Ni iba industry nung sangküm küm 25 ajungtsü anungji tang ya ibai lapoktsü mapang tetemsü asütsü amai ni bilemer,” ta lai ashi.
Ibala mesükba  course ya tan mezüng asütsü aser iba ya atema syllabus o workshops ajak lai design asütsü.
“Onok külemi mena hopta 12 atema course ka yangluogo. Iba course nung ken  yanglushitsü aser süoshi komala asemtsü sayuba den ken koma choreograph asütsü itemji sayutsü keta lir. Anungji iba coure nung nüngdakba ajak keta lir,” ta laisa ashi.
Iba choreography course agiba mapang lecturer tem tesem balala nungi jaoka parnok tebilemba lemsateptsü.