Farhan Akhtar-i yimra indang osang prokshitsü

Mumbai, July 15 (Agencies) : Sanofi Pasteur India indang flu awareness campaign atema actor-filmmaker Farhan Akhtar-i ambassador inyaktsü.

Rock On!! film nung tongti shilem agir Farhan-i vaccination ajanga influenza nokdangba indang osang prokshitsü.

Sanofi pharmaceutical company kübok vaccines division, Sanofi Pasteur India-i iba mapa tenzüker aser parnoki yimra indang meteta alitsü osangtem sangdongtsü.

Iba mapatong nung Farhan Akhtar-i ambassador ka ama tsüraburtem dang yimra ya süoki ia bilemtsü aser pei chirnurtem vaccination agidaktsüba ajanga kümzüka ayutsü ayongzüktsü.

“Tsürabur ka ama ni tanurtem temang asoshi bilemtsür aser iba jagi ni parnok anepaluba doctor tem den asüngdangyar. Yimra ya shirang tila ka dang masü saka kanga süoki ia bilemtsü viral infection lir ta angashidang ni kanga aoksa” ta Farhan-i osangbenertem dang ashi.

“Yimra nokdangtettsü aser mapang shitak nung mozü agiba ajanga tanur dak yimra matongtsü ta angazükdang temulung sadoka bilemer. Nisung aikati yimra atema tangatetba tai alitsü akok. Anungji ni iba osang sangdongtsü atema mulunga agizük,” ta paisa shisem.

Farhan aser Adhuna Akthar na jala ana- Shakya aser Akira na sosema lir.

“Yimra ya süoki ia bilemtsü wara ka lir aser kanga bulua menateper. World Health Organisation (WHO) ajanga ashiba agi vaccination agiba ajanga yimra nokdanger. Ajisüaka, yimra atema vaccine agitsü tangatetba aika dak mali” Sanofi Pasteur India ketdangser, Jean-Pierre Baylet-ia metetdaktsü.

“Iba jagi Sanofi Pasteur India-i iba mapatong tenzüker aser iba mapang onoki nübortem dang yimra indang temetettsü aser nokdangtsü osangtem prokshitsü” ta Baylet-isa ashi.