Father Kuriakose asüba ken o police-i asadangtsü

Chandigarh, Mongputeni/Oct 23 (Agencies): Nun kati Bishop Franko Mulakkal-i la den tashiyim agi medem ta aija ken o benoka aliba nung kuli agütsür rongnung Father Kuriakose Kattuthara asüba sülen Sangtennü Punjab police-i iba ken o ya yimya masüba agi asüba ken o ka ama agizüka bushisüngdangtsü metetdaktsüogo.
Police temi CrPC Section 174 kübok ken o ka benokogo, koba nisung ka asüba nung temulung melemi bilemba mapang benoka inyaker.
Jalandhar diocese nung putir Father Kattuthara Tentonü sür lia ngutet. Par kinungertemi ashiba agi, pa asüba dak temulung melemi bilemer aser pa tasümang postmortem ya parnok jakdang agitsü asoshi khangogo.
Kerala nung amendaker aliba Kattuthara adianu Jose Kattuthara-i ashiba agi, pa dangi Jalandhar nungi Father Michael Annikuzhikatil-i call süa pa adianu asüba osang metetdaktsü. “Pa asüba dak onoki temulung melemi bilemer aser pa tepset asütsü ta bilemer,” ta pai ashi.
Ajisüaka Jalandhar diocese nungi Father Peter-i, Kuriakose asüba dak temulung melemi bilemba aitsüogo. Pai ashiba agi, par kinungertemi pai Mulakkal anema kuli agütsüba ajanga temulung malemer. “Onok tsükchir masü saka ajak medemer dang lir,” ta pai ashi.
Father Kuriakose ya anogo 15 tejakdang Dasuya nung arogo kati meyipa yokogo, ta police-i ashi. Pa sentep ki telungtet nung lia liasü. Pai Bishop Mulakkal anema kuli agütsüogo, shiba nun ka dak tashiyim benshiba atema aija lir.
Father Kuriakose-i Missionaries of Jesus nun ya pusemogo aser pai ashiba agi, pai nun ya pusemba atema Arogo nung lenirtemi pa amokmerena aruogo.