Fawad Khan Pepsi kentenba sentong nung shilem agitsü

New Delhi, March 26 (Agencies): Pakistan nunger actor Fawad Khan shibai pa film tem nung jilushi yimya balala ajanga nisung aika pua liasü, pa tawa film asoshi masü kentenba sentong ka nung shilem agitsü asoshi renema aliba osang ajanga metetdaktsü. Pai Bollywood film ‘Khoobsurat’ aser ‘Fawad And Sons’ film tem nunga shilem agia liasü.
Küm 32 tain ‘Humsafar’ actor ya Pepsi indang kentenba sentong tulu ka nung shilem agitsü asoshi renema lir. Pepsi ‘Smash’ aser ‘Battle of the Bands’ sülen taruba sentong ya parnok asoshi tulutiba asütsü, ta osang ajanga metetdaktsü.
Osang ka ajanga ashiba agi, iba sentong nung ‘entertainment industry’ nungi nüngtugu nisung kar den Fawad dena iba sentong nung tongti shilem agitsü.
“Onoki pa kechi komala shilem ka agitsüar mejangja, saka pa iba sentong tulu nung shilem agitsü,” ta kasa osang ajanga metetdaktsü.
Fawad Pepsi Battle of the bands season nung parnok rock kentenba telok Entity Paradigm (EP) den shilem agiba nungi nüngtugu aküm.
Iba sentong ajanga kentenba industry nung nisung tasen aika ajungkettsü.
“Iba sentong nükjidong ya, sempet aliba nüburtem ajungkettsü asoshi dang masü, saka Pakistan nunger kentener telok aser parnok indang kentem tali ajungketsü asoshi lir,” ta kasa osang ajang shisem.