Fazl Ali College Sports Week tenzüker

Dimapur, October 08 (TYO): Tanü Brehostibar nü nungi tenzüka Fazl Ali College (FAC) kaketshirtemi par Sports Week sentong college football ground nung asayatsü tenzükogo.
Tanü asayamong tenzükba sentong nung taoba FAC kaketshir & Additional Deputy Commissioner, Mokokchung, Bendanglila tongti tesemdanger liasü.
“Ni yangi küm 20 tejaklen azüngba menungra bilemteter,” ta shia, kaketshirtemi kechisarena ajunga meranga inyaktsü aser college mapang ajak ajangzüktsü merangtsü tajungshiba olen ka tongti tesemdangeri tanü metetdaktsü.
General Secretary, FAC Students’ Union, Temjennaro-i pela agizükba onük jembiba sülen Games & Sports Secretary, Nungsangmongba-i asayar rong nung tenangzükbaren agidakja tanü asayamongji tenzüka liasü.
Iba asayamong ya asüng, Hokolbar nü tembangtsü.