FBI, CIA, NSA Chief temi Huawei Smartphones mamshitsü tetuyuba agütsü

Tsüklai 15, 2018 (Agencies): US sorkari ketdangsertem China nunger smarthphone yangluba company Huawei aser ZTE nunger amalai yangluba phone tem mamshitsü asoshi bill ka benoktsüba teinyakdak mapang ka nung CIA, FBI, NSA dena US nung intelligence chief parnok troki America nunger dang Huwaei-i yangluba product mesera service kecha mamshitsü asoshi ajungshiogo, ta CNBC sangdong ka ajana metetdaktsü.
Verge sangdong ka ajanga ashiba agi politician temi Huawei ya ‘China sorkar hadri ka lir’ ta rasaa shiogo. Cyber ajanga itangiter maparen balala inyakba dak sendakba nung tebilemtsü kaa osang ajanga ashiba agi, “US intelligence lokti-i mapang talangka nungi Huawei company kanga kümdanga asadanga aruogo, koba China’s People’s Liberation Army nung taoba mapang engineer kati kümtetba company ka lir.”
FBI Director Chris Wray-i CNBC dang ashiba agi, “Onok den tebilemdangba balaka aliba sorkar shirnoki onok indang telecommunications networks telung nung tashi angutsü asoshi meranger iba amala linük nungi company tem ozü linük nung mapa inyakdaktsütsü asoshi onoki kanga tebilemtsü akar.”
Paisa ashiba agi, “Iba amala company dak osang balala auyatsüba tashi lir aser ibaji dang masü parnoki memeteti inyaktsü tashi lir.” Huawei parnok pusema ashiba agi, “Cybersecurity tsütsü ICT vendor tem dang nungi parnok lendong maketba lir.”
Huawei pur America nung shishilembadak tetsüng ajemoka inyaktsü asoshi kanga timtem ajurua arudar kechiyong US sorkar aser yamaji shishilembartemi parnok den shishilembatsü asoshi memulunger. Tawa AT&T purden parnok tesendaktep yanglur aliba raksaogo.