FC Barcelona-i FIFA Club World Cup takok marok agizükogo

Yokohama, December 20 (Agencies): European champions, FC Barcelona teloki South American champions, Argentina nung tentetba River Plate telok madak final asaya koka 2015 FIFA Club World Cup takok marok tanü Deobar nü agizükogo.
Argentina nunger Lionel Messi-i goal 1 aser Uruguay nunger Luis Saurez-i goal 2 agütsüba densema, par Barcelona teloki goal 3-0 agi River Plate telok madak takok angu.
Football asayatsü tenzüker tanü tashi nung külem Argentina telok anema tan agi tanabenbuba asayasang, Messi-i tanü asaya tenzüker minute 36 buba nung külem asayar, Neymar-i agütsüba pass ball agizüka par telok asoshi mezüngbuba goal agütsü.
Asian champions, Guangzhou Evergrande telok den semifinal asaya nung par Barcelona telok asoshi takokba goal 3 prongla agütsüsang, Suarez-ia asaya tanabuba shilem tenzüker minute 4 buba nung tanabuba goal agüja par telok temaba jenjang nung ajungkettsü.
Tesülen, Neymar-i renemtsüba pass ball agizüka, Saurez-isa pa tekolak agi par telok asoshi tasembuba goal agüja tanü takokbaji bener arutsü.
2009 aser 2011 final asaya nung goal agütsüba densema, Messi-i tanü goal agütsüba sülen Club World Cup asayamong final asaya 3 tashi nung goal agütsür mezüngbuba asayar kümogo.
“Messi aser Neymar na temang mejungi liaka, tenati tanü asaya nung shilem agiba ajanga ozü asayartemi ozü telok asoshi bendanga agüja shilem agitsü temulungtetba tulu ayuba kuli angur,” ta Saurez-i tesülen metetdaktsü.
Barcelona teloki tan agi Club World Cup takok marok 3 buba agizüker lir.
Spain nung tentetba Barcelona teloki Champions League, La Liga, Copa del Rey aser European Super Cup takok maroka taküm agizükogo.