FC Barcelona telok FIFA Club World Cup final-i iogo

Yokohama, December 17 (Agencies): Uruguay nunger Luis Saurez-i hat-trick yanglua kanga junga asayaba yong par FC Barcelona teloki tang tasayadak FIFA Club World Cup asayamong final asayatsü jenjang tanü Brehostibar nü nguogo.
Barcelona teloki tanü goal 3-0 agi Asian champions, Guangzhou Evergrande telok madak semifinal asaya koka final asayatsü jenjang tajungji ajangzük.
China nung tentetba Guangzhou teloki European champions, Barcelona telok madak takok angutsüsa asaya mezüngbuba shilem nung kanga meranga asaya saka tatem nungbo par teloki tamakok ajurua liasü.
Tanü asaya nung Barcelona’er tongti asayar, Lionel Messi aser Neymar nati shilem magitetaka, par teloki tanü takok ngua South American champions, River Plate telok den final asayatsü jenjang angu.
Tanü asaya tenzüker minute 39 buba nung Saurez-i Guangzhou goalkeeper, Li Shaui-i teptokba ball agizüka par Barcelona telok asoshi mezüngbuba goal agütsü.
Mezüngbuba goal-ji agütsür minute 10 süir külen külem asayar, Andres Iniesta-i yanglutsüba pass ball agizüka, Suarez-i par telok asoshi tanabuba goal asaya tenzüker minute 49 buba nung agütsü.
Saurez-isa asaya tenzüker minute 67 buba nung tasembuba goal agüja hat-trick yangluba ajanga pai par Barcelona telok final-i anir ai.
Taküm June ita nungi tenzüka Coach inyaksang, Luiz Felipe Scolari lenisüba kübok Guangzhou teloki asaya 26 buba nung tan mezüngsüa tamakok ajurur lir.