FC Goa-i 3-2 agi Dynamos madak takok angu

New Delhi, December 06 (Agenies) : Tang tasayadak ISL asayamung nung tatembangbuba league asaya tanabuba tesadang nung FC Goa-i goal asem yoka 3-2 agi Delhi Dynamos madak takok nguogo. Iba takok ya ajanga parnok tan ISL asayamung nung points 25 ngua temaba jenjang nung lir.
Dynamos nungi forward asayar Reinaldo Greene aser Adil Nabi nati asaya mezüng tesadang nung goal ka ka yok. Ajisüaka asaya tanabuba tesadang minute 56 buba nung FC Goa nung defender Debabrato Roy melena aitsang midfield nung asayar Romeo Fernandes-i minute 68 nung goal ka aser minute 69 nunga goal ka ta yoka Dynamos den kasa aküm. Iba sülen minute 90 buba nung FC Goa nungisa midfield Joffre Mateu-ia goal ka yoksema parnoki 3-2 agi Delhi Dynamos madak takok angu.
Tang tashi nung FC Goa 14 ben asayaba nungi points 25 nguteta lir. Parnok sülen Atletico de Kolkata points 23 aser Chennaiyin o Dynamos naprong points 22 lir.
Goal timba yokba repranger Chennaiyin FC tasembuba jenjangi ai.
Iba sülen FC Goa aser Dynamos na mezüng semi-final league, December 11 nü Delhi nung aser tanabuba semi-final league, December 15 nü Goa nung ta asayatsü.
Ano anunga aliba, tanabuba aser tasenbuba jenjang nung alir, Atletico de Kolkata aser Chennaiyin FC na tanabuba semi-final asaya atema mezüng semi-final league December 12 nü aser tanabuba semi-final league December 16 nü asayatsü.