FC Goa Indian Super League asayamong final-i iogo

Fatorda, December 15 (Agencies): Tanü semifinal shilem tanabuba nung FC Goa teloki goal 3-0 agi Delhi Dynamos telok tsükdakja tang tasayadak Indian Super League (ISL) asayamong final nung shilem agitsü jenjang nguogo.
Goa teloki semifinal shilem mezüngbuba nung goal 0-1 agi tamakok ngua liasü saka par teloki tanü takok anguba yong par teloki points 3-1 agi Delhi telok den jenjang tajungba ngua final-i aier lir.
Tanü asaya nung Goa teloki goal 2 agi timba mesüra tie-breaker metsüteptsü jenjang ajangzükba ajanga dang final nung shilem agitsü jenjang angutsüsa tia ajurua liasü aser tatem nung par teloki alizüngji ajangzükteta final-i iogo.
Joffre Matue-i külem asayar, Pronay Halder-i renemtsüba pass ball agizüka par Goa telok asoshi mezüngbuba goal agütsü.
Rafael Coelho-ia Bikramjit Singh-i agütsüba ball agizüka par Goa telok asoshi tanabuba goal minute 27 buba nung agütsü.
Tesülen, asaya tenzüker minute 84 buba nung Dudu Omagbemi-i par telok asoshi tasembuba aser takokba goal agüja par Goa telok final-i anir ai.