Kohima, February 08 (Agencies): Naga Political Issue (NPI) atema Nagaland Legislators’ Forum nungi Parliamentary Working Committee February 15 nü New Delhi tonga aotsü aser linük nung yimten telok balala nungi Central lenirtem ajurua Naga yimten tebilemtsü tekaratiba nung latettsü atema teyari meshitsü.
Tanü Hombarnü State Assembly complex nung Assembly Speaker, Chotisuh Sazo aser Chief Minister, TR Zeliang na leniba nung Committee senden amendang iba telemtetbaji agia liasü.
Iba senden nung Committee-i, New Delhi nung oa linük nung yimtenren telok balala nungi lenirtem ajurutepa Naga yimten tebilemtsü tekaratiba nung latettsü atema teyari meshitsü lemtet.
Iba dak alia House nung aliba züngsem 60 prong adenba committee-i, tawa Naga Hoho aser Eastern Naga People’s Organisation na longjemer Myanmar-i oa NSCN(K) ketdangsertem ajurua State sorkar, Nagaland Legislators Forum aser Naga nungertemi India sorkar den maneni ceasefire tezüngzüktep kadaktsüner ta metetdaktsüba pelaa agizük.
NLF indang Parliamentary Working Committee-i mepishiba nung ajemdaker state nung tribal tentet tulu ana- Naga Hoho aser Eastern Naga People’s Organisation na January 24 nungi February 2, 2016 tashi Myanmar nung oa munga liasü.
You must be logged in to post a comment Login