Feb 17 nungi Itanagar nung Film, Northeast 2016 amungtsü

Dimapur, January 21 (TYO) : North East India nung cinema ajungkettsü nükjidong nung Arunachal Pradesh sorkari Film Federation of Arunachal (FFA) den külemi mezüngbuba regional film festival Film, Northeast 2016 ayongzüker.
Iba benjung ya February 17 nungi 20 tashi Annexe Lawns, Indira Gandhi Park, Itanagar, Arunachal Pradesh nung amungtsü.
Birhostibarnü Hotel Shilloi, Dimapur nung osangbener senden ka nung Secretary, IPR, Govt of Arunachal Pradesh Sonam Chombay-i ashiba agi, “asenoki northeast ta ajaba state 8 nungi film yanglurtem adenshia pei tebilemba aser taginübatem lemsateptsü sabang ka südaktsütsü nükjidong nung iba benjung ayonger.”
Ano, iba benjung ajanga northeast film yanglurtem atema network (virtual & real) ka tentettsü aser ibaji ajanga northeast nung lanur film yanglurtem ajungmesotsü aser parnok sempet tajungba nung amshitettsü, ta Sonam Chombay-isa ashi.
Senden nung Festival Director Moji Riba-i benjung indang temetettsü ashidang, benjungji shilem ana- competition aser non-competition lemsar agitsü ta metetdaktsü.
Competition shilem nung Chiaroscuro, First Cut, Clapperboard aser Our Stories telemsa balala alitsü aser non-competition shilem nung Magic Mirror, Bioscope, Clapstick Caravan aser Arunachal Prevue telemsatem alitsü, ta Moji Riba-isa ashi.
Film, Northeast 2016 indang sempet agütsüba sentongji Arunachal Statehood Day benjungmung nung shilem ka ama agitsü aser Zowe Madrigal dena kentenba sentong ka agitsü.