Feb. 21, 2017 nü Chümoukedima yimkümba anogomung amung

Dimapur, February 21 (TYO) : February 21, 2017 nü Chümoukedima council hall nung yimkümba anogomung mungogo, ta sangdong ka ajanga metetdaktsü.
Iba sentong nung mendenbuba Chümoukedima Village Council (CVC) chairman Razouvotuo Chatsu liasü aser CVBC asst. Pastor Pukrosül kin-i temoatsü meshia sarasademer sentong tenzük. Sentong nung tajungshi o jembir asemji VEC Chairman Kengulie Shüya, Chümoukedima Town nung Head GB Kelenguzo Kuotsu aser CPO Gen. Secy Zakievisie Kruse nunger liasü, ta sangdong ajangasa ashi.
Kengulie-i Chakhro Angami nung yim tejentiba rongnung ka bilemteta nüburtem dang tangatettep ka nung lungjemer alitsü ayongzük.
Kelenguzo-i, asenoki asüngteta alitsü merangtsüla aser yimer den lungjemer tashi ita alitsü nüngdak, ta ajungshi.
Zakievisie Kruse-i Chümoukedima tenzükertemi tenla tulu agüja iba yim kümtetdaktsüba asoshi tenüngsang tulu agütsü. Pai, yimtaklirtemi marendaki lokti ajungtsü asoshi telok nung shilem agitsüla, ta ashi.
Dietholezo Shüya, Kuobeizo Medoze, Vikhwe Yhoshü aser Viechübeizo Sokra nunger nem lokti atema meranga inyakba asoshi sempet agütsü. Chümoukedima yimtsürtemi sobaliba ken ka aten aser Head GB, Zeno Kire-i anküp tepela o jembi, ta sangdong ajanga metetdaktsü.