Feb. 25 nungi Kohima nung Sekrenyi Mini Hornbill amongtsü

Kohima, Tsüklai/February 23, 2019 (TYO): Angami nunger tongti benjung- Sekrenyi Mini Hornbill festival, February 25 nungi February 27, 2019 tashi yangi Khouciezie Local Ground aser Tuophema yimdak na nung ayongzüka amongtsü, ta ketdangsertem osang ka ajanga metetdaktsü.
Iba festival ya Angami Public Organization (APO) aser Nagaland sorkar nati “Purifying Confluence” omen nung ajemdaker ayongzüker.
Sekrenyi dang ya ‘Phousanyi’ taka ajar, aser Angami Naga nunger tongti benjung ya kümshia ayonga amonger.
Sekrenyi benjung ya temang, shisatsü aser tanela ajak meshitetba mapang ka lir aser iba mapang nung tesüiba mapang aibelenba mapatem aser temenen mapatem merükteter; temang aser tanela naprong meshitettsü atema par kin aser yim ajaki shilem agir.
Iba benjung ya Kohima Local Ground nung February 25-26, 2019 anogotem nung agitsü aser February 27 nü Tuophema yimdak agitsü.
Asemnü benjung nung anogo balala nung tetushi tejaokertemji Ao Senden Tir, Chubawati Longchar, Angami Gazetted Officers Krotho Tir, Dr. Kedo Punyii aser Rural Development Advisor, Dr. Neikiesalie (Nicky) Kire nunger asutsü aser tongti host ji Chief Minister Neiphiu Rio asutsü.
Iba benjung tetenzük sentongji February 25 anüngdang 11:00 nungi agitsü.
Anogo asemnü Mini Hornbill nung sobaliba saisapong balala aser ken tetoktepba agitsü aser exhibition stalls lapoktsü.