Feb. 26 nungi 27 tashi Nagaland Youth Summit YN-i ayonga amungtsü

Kohima, February 18 (TYO): NBCC Convention Center, Kohima nung February 26 aser 27 anogotem nung “Celebrating young Nagas: Preparing the next generation” omen nung ajemdaker ‘Nagaland Chapter of YouthNet’-i ‘Nagaland Youth Summit’ ananümung senden ka ayonga amungtsü. Iba ananümung senden ya State Sorkari sen teyari agüja amungtsü.
Iba summit ya Nagaland Chapter of YouthNet küm 10 ajungba nüngtem nung amungtsü, aser iba ya Nagaland nung lanur senden rongnung tulutiba asütsü imlar, ta Dream Café nung tanü Brihostibarnü Director (elect) Lezo Putsure, Theja Meru aser Neingulie Nakhro nunger lia osangbenertem den jembiba mapang YouthNet Director Hekani Jakhalu-i ashi.
Hekani-i, “Iba summit sabang nung India tesem ajak nungi Naga nunger maparen balala nung takok angur parnok nisung 54 tashi adentsü aser state o bendang tesem balala nungi tejaoker/delegates 2000 shi adentsü imlar,” ta metetdaktsü.
Iba sentong nung lanur ka teinyaktsü tasen lemsatepa ajungkettsü aser Nagaland nungi maparen balala nung takok angur tetsür o tebur nem parnok takok tulu asoshi tetushi agütsütsü. Iba inyakyim ajanga tarutsü atema tangazükba aser shisatsü nung tali terenlok angutsü.
Kasa senden nung state tesem balala nungi lanurtem adenshia kati ka den pei tebilemba lemsatepa tasüngdangba balala atema telangzüba lemsateptsü asoshi maongka angutsü. Iba den külemi state tesem ajak nungi tongtibang lenirtem den shisa tasen agütsür aika adenshia shisatokten mapang ka asütsü, ta lai ashi.
Laisa ashiba agi, iba senden nung telok lemsar olemtep mapa akadang state rongsenkettsüng, linük yangerba tsütsü lanur yimsüsür ka teinyaktsü aser Naga nunger Khrista asoshi onüktem den entrepreneur terenoklok tsütsü jembitsü.
Feb. 27 nü, Entrepreneurship, Skill Development & Good Governance onüktem nung session asem lemsar jembitsü. Item session asemprong nungi tongtibang onük ka ka agiteter sorkar nem mapa akümtsü asoshi bendanga agütsütsü, ta lai ashi.
YouthNet nung Chief Patron, Chief Minister T. R. Zeliang-i, tananü telok lemsar olemtep akaba sentong lapoktsütsü.
YouthNet nung züngsem Theja Meru-i, iba senden ya state nung lanur ka teinyaktsü tasen lemsatepa ajungkettsü nükjidong nung amunger, ta ashi.
Ano YouthNet nung züngsem Neingulie Nakhro-i, YouthNet-i entrepreneur mapa takok ngua inyakteter ka nem “YouthNet Trail Blazer Award” special award agütsütsü, ta metetdaktsü.