Feb 27 Nagaland election atema nübo yimtepba manener

CM Neiphiu Rio-i Tseminyu nung NDPP lenirtem asoshi nüboyimba sentong katsüba mapang.

Kohima, February 17, 2023 (TYO): Nagaland nung assembly election agitsü anogo 10 dang anünga lia telok balalai nüboyimba sentong kanga meranga ayonga agidar.

Political party tem aser candidate temi vote meshia tesem balala nung nüboyimba maparen kanga meranga inyaker.

Political party 12 nung candidate 164 aser independent candidate 19-i Assembly menden 59 atema tokteper.

February 27, 2023 nü polling asütsü aser March 2, 2023 nü votes azüngtsü.

Zunheboto district kübok Akuluto constituency nung BJP candidate aser tang teinyakdak MLA Kazheto Kinimi den tetokteper shinga mali pai takok nguogo.

Election jakdang Nationalist Democratic Progressive Party (NDPP) aser BJP tsüngda menden 40:20 lemsar tokteper. NDPP aser BJP teloktemi Neiphiu Rio chief ministerial candidate ser kümsük tanaben sorkar akümtsü meranger.

BJP national lennirtem aser union minister temi Hokolbarnü Mon aser Wokha district tem nung sentong balala nung shilem agiogo. Tanü shilem agirtem rongnung Sarbananda Sonowal, Kiren Rijiju aser John Barla nunger dena liasü.

Külen, NDPP lennir aser star campaigner Neiphiu Rio-i Phek aser Tseminyu district tem nung par candidate asem atema nüboyimtsü.

Taoba election nung Naga Peoples’ Front (NPF)-i menden 26 nung takok ngua liasü saka taküm parnoki menden 22 nung dang tokteper.

NPF-i election jakdang tanga telok kecha dena tesentaktep yanglua mali saka NPF lennir Kuzholuzo Nienu-i election agiba sülen tanga political party aser candidate tem den yariteptsü mulunga lir ta shiogo.

Azo Nienu ya United Democratic Alliance indang co-chairman lir. UDA ya 2021 küm party ajak senteper akümba sorkar lir.

Pai NPF candidate tem aser lennirtem dang tanga political party tem anema mejembitsü metetdaktsüogo.

NPF ya sorkar mashii ka nung adentsü akok anungji NPF indang manifesto, alizüng aser teinyaktsütem indang dang jembiang ta Azo-i par party candidate aser lennirtem dang tetuyuba agütsüogo.

Congress-i 2003 tashi Nagaland nung sorkar yimsü süa aru saka assembly nung parnok MLA ka danga mali. Ajisüaka, taküm election nung parnoki candidate 23 toktepdaktsür.

2015 küm Congress MLA 8-i NPF nung dena liasü aser taküm Congress-i lanurtem aser tetsür candidate shima toktepdaktsür.

NDPP, BJP aser NPF teloktemi pei pei constituency nung star campaigners anir arua sentong agir saka Congress-i media sabang balala nung sorkar anema osang agütsüyonga arudar.

Congress-i sorkar akümba nung BJP den madentsü saka kasa tangatetba aliba secular front ka nung adentsü ta shiogo.

Congress-i Hokolbarnü AICC general secretary aser MP Jairam Ramesh Dimapur-i anir arua lir. Dimapur-I menden nungi State Congress president K Therie tokteper.

Lok Janshakti Party (Ram Vilas)-i tan mezüng atema Nagaland election nung shilem agir aser parnok candidate 15 lir.

Taküm election nung National People’s Party (NPP) aser Nationalist Congress Party (NCP) nungi candidate teranana (12), Republican Party of India (Athawale) nungi 9 aser Janata Dal (United) nungi 7 lir.

Tang teinyakdak NDPP aser BJP MLA tem dena ticket mangurtem teimba ka NPP, NCP, RPI(Athawale) aser JD(U) ticket tem amer tokteper.

Maneni, Rashtriya Janata Dal nungi candidate 3 aser CPI o Rising People’s Party nungi kaka (1) lir.