Feb. 4 nü Rahul aser Priyanka nati osangbenertem den jembitsü

Amethi, Jan. 26 (Agencies): February 4, 2019 nü Lucknow nung Congress Party Tir, Rahul Gandhi aser teno Priyanka Gandhi nati tang mezüng party office ketdangpurtem ama osangbenertem den külemi jembitsü, ta osang ka ajanga metetdaktsü.
Tenati tang agi tanabenbuba ossangbenertem den külemi jembitsü ajisüaka office ketdangpur amabo tang mezüng tenati jembitsü.
2004 küm Priyanka-i, Rahul-i Amethi nungi tokteptsü ta sangdongba mapang nung tenati mezüng külemi osangbenertem den jembia liasü.
“Tangbo Rahul-i teno metetpelatsütsü,” ta UP nung Congress lenir kati metetdaktsü.
Tenatisa Allahabad nung Kumbh semdangtsü aser February 10 nü Basant Panchami nung tamangba yimsü dak sendakba sentong nung shilem agitsü. Iba sülen tenati roadshow ka nung shilem agitsü.
Yaküm küm tatemlen Madhya Pradesh, Rajasthan aser Chhattisgarh assembly elections nung Congress-i takok anguba sülen Congress-i Kumbh nung moapu shilem tali 40% mekazükogo.
Congress osang ajanga ashiba agi, February 4 nü Priyanka-i UPCC office nung media centre tasenba semzüktsütsü aser lai tetsü, Sonai Gandhi toktepba Lok Sabha constituency- Rae Bareli nungi tokteptsüa akok.
Yakünü Rahul-i, Uttar Pradesh nung Congress chief minister ka alitsü ta jembia liasü, aser ibaji ajanga Priyanka-i state nung nendaka inyaktsü asü, ta bilemer.
Party osang ajanga ashiba agi, Priyanka-i yimtenren nung ajemokba ajanga SP-BSP teloktep konghshitsüa akok, ajisüaka party-i Mayawati, Akhilesh aser Dimple Yadav nunger denbo candidates metoktepdaktsütsüa akok.