Feb ita India-Pak Foreign secretary senden amentsü

Karachi/New Delhi, January 24 (Agencies): Pakistan ketdangser kati, February ita nung par linük foreign secretary-i India foreign secretary ajurua senden amentsü, ta metetdaktsü.
Dawn osang ajanga ashiba agi, ketdangser jagi iba senden amentsü anogoji ano tatem küma melemtet ta ashi.
January 15, 2016 nü India-Pakistan foreign secretary level senden mena yimjung ken o maneni jembitsü sentong liasü, ajisüaka kiralongrartemi Pathankot airbase amakba ajanga iba senden thinena liasü.
Iba senden anogo lemtettsü atema linük anaprong nungi ketdangsertem tongtepratepa jembidagi.
Yaküm France yimtiba, Paris nung Pakistan Ato kilonser Nawaz Sharif aser India Ato kilonser Narendra Modi na ajurutepa liasü aser Modi-i ajungbena Lahore semdangba sülen taoba ita Pakistan aser India napronglai linük ana tsüngda yimjung ken o tanaben asentenshia jembitsü bangjema liasü.
Line of Control aser Working Boundary na nung injang yoktepa mepetmesü aliba ajanga India aser Pakistan na tsüngda küm ana tashi yimjung ken o mejembiteti aruogo.