February 1 nü interim budget dang benoktsü: Finance Ministry

New Delhi, January 30 (Agencies): Centre sorkari February 1 nü budget ajak benoktsüa akok ta osang kanga buluba mapang ka nung tanü Finance Ministry-i, parnoki budget ajak masü saka interim budget mesüra vote-on-account dang benoktsü, kechiyong April-May ita nung Lok Sabha elections agitsü, ta metetdaktsü.
Osangbener den jembidang Ministry of Finance Official otongdar, DK Joshi-i, “Iba Budget dangji Interim Budget 2019-’20, ta ajatsü. Iba nungji teratatsü kecha mali,” ta metetdaktsü.
Ano finance ministry nungisa tanga ketdangser kati, taküm budget rangben benoktsü atema Ministry-i metetdakja mali, ta ashi.
Centre sorkari budget rangben benoktsüa akok ta osang prokba ajanga taoba hopta Opposition-i sorkar aija liasü.
Congress-i, sorkari vote-on-account masü saka küm pongu atema budget rangben benokra party-i Parliament kima aser kilung naprong nung sashia longkak aittsü, ta amokmerena liasü. Taoba hopta Congress lenir, Manish Tewari-i, sorkari budget rangben benokra ibajibo linük temzüng alema inyaker asutsü, kechiyong financial year sülenbo tang aliba sorkar kümsük ya anogo 56 nung tembangtsü, ta metetdakja liasü.
Tewari-i, “Küm pongu tsüngda trokben tashi budget ajak benoktsüsa NDA-BJP sorkar dak temeden mali. 2014 küm May ita nung parnoki sorkar tentetba sülen 2014-15, 2015-16, 2016-17, 2017-18 aser 2018-19 kümtem atema budget ajak benokogo,” ta metetdaktsü.
Tang Modi-i aniba Centre sorkar kümsük ya taküm May 26 nü tembangtsü, ta shia Tewari-i, “Koma ser sorkari anogo 365 atema budget benoktsü sayangteter?” ta ashi.
Hombarnü taoba mapang BJP lenir, Yashwant Sinha-i Centre dang interim budget dang benoktsü mepishia liasü. Taoba mapang Union finance minister Sinha-i, Lok Sabha election agitsü lia sorkari budget ajaka benokra ibajibo tim masütsü, ta jembia liasü.
Lok Sabha election agitsü küm nungbo sorkar tasenba jagiang July ita nung budget rangben benoker.
Tang Finance Minister, Arun Jaitley US nung treatment agidar, anungji Interim Finance Minister, Piyush Goyal-i budget benoktsü.