February 6 tashi nung Mobile-Aadhaar sendakteptsüla: Centre

New Delhi, November 03 (Agencies): Supreme Court tetuyuba ka metetdakja Brihostibarnü Centre-i, E-KYC verification kübok sangküm February 6 nü tashi nungbo subscribers ajaki parnok indang mobile phone number ji Aadhaar den sendakteptsüla aser bank account tasen lapoktsü atema Aadhaar proof agütsütsüla, ta metetdaktsü.
Centre indang affidavit tasenbaji advocate, Zoheb Hossain ajanga file asü, aser affidavit nungji, Lokniti Foundation ken o dak sendakba nung ajemdaker Aadhaar-mobile phone sendakteptsü atema Supreme Court-i melaogo, aser iba maparenji February 6 tashi nungbo inyaktsüla, aser window period küm ka alitsü, ta metetdaktsü.
Sorkarisa, Aadhar maliba ajanga linük nung nisung ka danga yaseta asüba osang mali, ta ashi.
“Aadhar aser mobile phone number sendaktepba maparenji sorkar kija ajangabo meinyak, kechiyong ibaji SC-ia lateta lir,” ta Centre-i ashi.
Centre-isa, Aadhaar aser tang aliba bank accounts sendakteptsü atema ano anogo atsülangja March 31, 2018 tashi mapang agütsür, ta metetdaktsü.
Mobile phones aser Aadhaar sendakteptsü anema temepishiba ka benoka liasü, aser ibaji judge anati akumba bench kati angadanga liasü, iba sülen SC-i sorkar dang iba onük nung hopta pezü tsüngda telangzüba agüjang, ta metetdaktsü.
Aadhar ajanga nija ka miim osangtem temeten agiener ta temepishiba ken o aika benoka lir aser ibaji Constitution bench kati angadangtsü.
Centre-isa, “Aadhar den mesendaktepba atema tang aliba bank account ji March 31 tashi ‘non-operational’ makümtsü. Ajisüaka bank account tasen lapoktsü atemabo Aadhaar mesüra enrolment ID maitsü kuli atema agütsütsüla. Tang aliba account holders tem nem March 31 tashi Aadhar based verification atema mapang agütsür, aser ibaji matong tashibo nokdanga matasü,” ta metetdaktsü.