February ita nung sorkari Netaji indang kaket 25 sayatsü

New Delhi, February 14 (Agencies): India nüjiso atema rarar, Netaji Subhas Chandra Bose indang miim kaket 25 tan ita sorkari sayatsü, ta tanü Culture Minister, Mahesh Sharma-i metetdaktsü.
Küm 70 dak tema samar aliba Netaji indang miim kakettem sayatsü dak sentakba tasüngdangba ka langzüdang Sharma-i, “Onoki ita shia pa indang miim kaket 25 sayatsü. Tan ita sayatsü aliba miim kakettemi onoki sayatsü renema lir,” ta ashi.
Tamalen sorkari, ita shia National Archives of India (NAI)-i Netaji indang miim kakettem digital copy nung sayatsü, ta sangdonga liasü.
Taküm Netaji sor küm 119 ajungba anogomung, January 23 nü Ato kilonser, Narendra Modi-i Netaji indang miim kaket 100 dak tema sayaja liasü.
Netaji indang miim kaket 25 February 23 nü sayatsü.
“Netaji indang file 25 February 23 nü sayatsü. Iba sülen ita shia 23 nü item kakettem sayatsü imlar,” ta osang ka ajanga ashi.
Taoba ita sayaba Netaji indang puti otsü kakettemji tapak 16,600 dak tema liasü, aser item kakettemji British nunger yimsüsüba mapang nungi 2007 tashi indang lir, ta ketdangser kati shiogo.
NAI-isa Netaji dak sentakba kakettem bendentsü atema website ka lapokogo.
Yaküm October ita nung Modi-i Netaji’er kinüngertem ajuruba mapang pai, Netaji dak sentakba kakettem sorkari sayatsü ta sangdonga liasü.

You must be logged in to post a comment Login