February nungi tenzüka Bru nunger par state-i tanaben yoktsü

Aizawl, Jan. 08 (Agencies): Tripura relief camp trok nung anenzüka aliba Bru nunger nisung 32,800, February ita tanabuba hopta nungi tenzüka par state-i meyipa arutsü, ta Mizoram Home department nung Additional Secretary, Lalbiakzama-i metetdakja liasü.
Bru nunger kibong 5,413 Mizoram state-i meyipa arutsüba sentong tenzüktsü asoshi telemtetba agiba osang, Ministry of Home Affairs aser Mizoram sorkar na tsüngda New Delhi nung senden amenba nung atensang Lalbiakzama-i telephone ajanga osangbener dang shia liasü.
Iba senden nung mendenji Ministry of Home Affairs nung Special Secretary (Internal security), Mahesh Kumar Singla liasü
Bru nunger parnok alidaki tanaben meyiba yokba sentong nung intoktsü aliba senotsü ya Mizoram sorkari tanaben reprangshir Centre-i menoktsü asoshi agütsütsü, ta Lalbiakzama-isa shia liasü.
Relief camp trok nungi Mizoram nung alir tejangja tejangja nisungtem bushitettsü asoshi sentong ka taoba küm November 2 nungi 23 tashi agia liasü.
Parnok alidaki meyipa yoktsü sentong ya November 30 nungi tenzüktsü renema liasü, saka Centre ajanga sen peria magütsüba aser sen 500 aser 1,000 tejenten anenba ajanga iba sentong metenzükteti liasü.