Federer-i Hopman Cup tasembuba koktetogo

Switzerland nunger Roger Federer aser Belinda Bencic nati Germany nunger Alexander Zverev aser Angelique Kerber na akokba sülen Hopman Cup amer tangokba noksa nung angur.

Aenjeti/January 5, 2019 (Agencies): Honibarnü Switzerland team-i 2-1 agi akokba sülen Hopman Cup otsü nung asayartem rongnung Roger Federer ya takok tajungtiba anguba asayar kümogo.
Federer ya asayar tem rongnung Hopman Cups asemben tashi akokba asayar mezüngbuba kümogo aser Belinda Bencic den longjemer iba asayamung anaben tashi atonga kokogo.
Taküm agi tanabenbuba Switzerland team-i Germany nunger Alexander Zverev aser Angelique Kerber na kokogo.
Taküm iba asayamung akokba dena Switzerland-i iba asayamung pezüben kokogo aser United States (trok) sülen parnok tanabuba jenjang nung lir. Federer-i mezüngbuba Hopman Cup 2001 küm koka liasü kong pa Martina Hingis den külemi longjemer asayaa liasü.
Arishi küm 37 tain asayari tebur kija asaya nung Zverev koka par telok tejakdang toktsü, saka Kerber-i tetsür kija asaya nung Belinda Bencic akokba ajanga tarep temeyoktep asaya ajanga takoker bendangtsüsa aküm.
Tarep temeyoktep asaya nung Federer o Bencic nati 4-0, 1-4, 4-3 (5/4) agi Alexander Zverev aser Angelique Kerber na koka takok marok ngutetogo.
Tebur kija asaya nung Federer-i 6-4, 6-2 agi Zverev madak takok ngua liasü.
“Ni hopta tepeyong kanga junga asayatetba atema kanga pelar. Takok nung tembangtsü ya kanga tajung aser ni tanü serve junga aoba den kanga junga asayateta liasü,” ta Federer-i asaya tembangba sülen ashi.
Kasa mapang nung tetsür kija asaya Kerber-i 6-4, 7-6 (8/6) agi Bencic madak takok anguba sülen Bencic tenüng sanga Kerber-i ashiba agi, lai tatembangba point tashi kanga meranga asayaogo.