Federer-i Malawi nung tanurtem sentong ka lapoktsü

July 19, 2015 nü Switzerland nunger tennis asayar Rodger Federer-i Kamuzu International Airport atongba sülen Malawi tanurtem den külemi agiba noksa angur. 

Malawi, July 20 (Agencies): Roger Federer-i pa tang azünga aliba mapang Malawi nung oa tanurtem asoshi sentong ka tenzüktsüogo.
Grand slam 17 tashi nung takok angusang, Federer-i pa indang foundation ajanga fund agüja Africa anüolentip len aliba Malawi nung tanurtem sentong ka tenzüktsüba ajanga alima nung temelenshi bener arutsütsü.
Tayimtsü anenba tesem tonger külen pai, tanurji tarutsü asoshi nükla lir aser parnok nem kaketshisatsü agütsütettsüsa ni maongka anguba asoshi kanga pelar, ta AFP osang ajanga metetdaktsü.
Tangar memenepi aliba tanurtem shirnok rongsen maliba ajanga kaketrejui moteti lir parnok yaritettsü asoshi ni kanga meranga inyaka liasü, ta pai shisem.
“Tanur ajak nem kaketshisatsü angutsü asoshi maongka agütsütsüla, ta ni bilemer aser iba dakji ajemdaker ni akokba tashi parnok nem teyari agütsütsü meranger,” ta Federer-i ashi.
Roger Federer Foundation aser DAPP NGO na lokteper yimtsüng tem nung school züngpeter anener aser azüoktsü asoshi maparen inyakdar, ta sangdong ka ajanga ashi.
Federer-i 2011 küm nungi ‘Early Childhood Care & Education’ yaria arur aser 2021 tashi nungbo pai tanur 135,000 tashi nem teyari agütsütsü nükjidong lir.
Roger Federer Foundation ajanga Namibia, South Africa, Zambia aser Zimbabwe nunga tanurtem nem teyari agütsüdar.